منتدى قرية كوري للجميع

المواضيع الأخيرة

» تاريخ وانساب كوري
الجمعة ديسمبر 12, 2014 9:37 am من طرف Mohammed

» الجابرية تحيي الثورة
الأربعاء يوليو 02, 2014 5:51 pm من طرف ahmed almazoon

» المولد النبوي الشريف
الجمعة يناير 10, 2014 7:23 pm من طرف ابراهيم عبدالحافظ ابراهيم

» تغيــر حالنــــــا فمـــا السبب ?
الجمعة يناير 10, 2014 6:59 pm من طرف ابراهيم عبدالحافظ ابراهيم

» تذكره..............................
الإثنين يناير 06, 2014 10:42 pm من طرف ابراهيم عبدالحافظ ابراهيم

» من اشعار محمود الجيلى
الإثنين يناير 06, 2014 10:10 pm من طرف ابراهيم عبدالحافظ ابراهيم

» ...........
الإثنين يناير 06, 2014 9:56 pm من طرف ابراهيم عبدالحافظ ابراهيم

» بطاقات تـــــعـــــارف
السبت يونيو 08, 2013 1:29 pm من طرف ود شيخ منور

» يا تموت يا تعضي السكوت
الأربعاء ديسمبر 26, 2012 9:40 am من طرف عثمان كوري

تصويت


    مسدار كوستي

    شاطر

    Mohammed
    عضؤ نشط
    عضؤ نشط

    مسدار كوستي

    مُساهمة  Mohammed في الخميس مارس 11, 2010 12:36 pm

    مسدار كوستي



    من مية سنة كانت فلاية وصي
    وبعد هادي السنين صبحت عمار بالحي
    اتوافدت عربان للنيل تدور الري
    شافت اراضيها وعزمت سكون الحي
    &&&
    الشاطي القريب كانت بداية انسان
    وكت جاها الخواجة وقرر فتح دكان
    صبح قبلة عرب من كل فج ومكان
    واتباهى الوجود بي كوستي في الازمان
    &&&
    السن مية سنة شابة وجمالا يسر
    الاسم الجميل كوستي ومحمية من كل شر
    المهنة التجارة او ياخي قولو سفر
    لي كافة السودان بي نيلنا او بقطر
    &&&
    وما بنسى الزراعة فيها الأراضي وفيرة
    تشرب مياه النيل وتدينا من خيرا
    ناكل وندي الكل والباقي لي طيرا
    وشوفو الجمال يا ناس في كوستي وين غيرا
    &&&
    سكانا يا حلوين من كل جنس ولون
    عايشين ومتصافين ما فيهم البيخون
    تلقا الشوايقة كتار ومن الجعلتي بطون
    والحمدي والحساني زينة رجال الكون
    &&&
    وشوفو الدناقلة كمان في قلبها الريان
    والا المحس والحلفا في الجيرة هم سيان
    فلاتتها ونوبيها ضاربين مثل انسان
    في عيشتو متسامح وكل عشقو للسودان
    &&&
    في كوستي حب للخير وانسانا متصافي
    فيها الرواح للروح ونسيما كم شافي
    بحر ابيض الرقراق من حنها الدافي
    مدمن هواها ويوت بديها من مافي
    &&&
    لوجينا للإحياء واقعات شمال وجنوب
    احياء شمال السكة ناسا عزاز وتلوب
    مبداها من الشاطي ثم اتجاهنا غروب
    الحلة الجديدة وتجي الرعاية دي صوب
    &&&
    ناسا قدام بالحيل وفي الحسبة هم اسرار
    تدخل لبيت الاول تمرق في اخر دار
    عايشين حياتهم طيبة من تبو قاموا صغار
    شايلين حنان النيل ومن قدرو اخدو أقدار
    &&&
    ثم الرديف الاشهر في الحي كلامنا كتير
    كم قالو عنو وقالو ما انصفوهو الغير
    ساكناهو كل قبيلة وكان التمازج خير
    بالاختصار يا ناس صبح السودان تصغير
    &&&

    واحياء جنوب السكة مبداها من السوق
    وحي المرابيع جنبو سكن الوظايف الفوق
    او هـــــكذا قد كان قـــــــبال بروك النوق
    والدنيا تصبح جايطة والراتب اصبح طوق
    &&&
    ثم الحديد والسكة حيي الربيت فيهو
    حيا الغمام الحي الشوق دوام ليهو
    انسانو روعة وجد في بالي طاريهو
    ملعب صبانا الغر و ما اظني ناسيهو
    &&&
    والنصر من كركاب سكانو ناس احباب
    وكنيسة الأقباط معلم يناطحو سحاب
    سبعة وتمانية كمـــــان بحارة او جلاب
    ليهـــــــم تحايانا من داخل الالباب
    &&&
    ما قلنا كل الفيها اصلو الحكاية إشاره
    وذكر البيوت والناس عايزلو ياخي شطاره
    لكن خلاصة القول لو تفهمو اماره
    كوستي الجمال فيها ما ظني يتضارا
    &&&
    الشي الغريب وعجيب في معالما المشهورة
    كل المعالم نــــــاس مـــــا أبنية وصـــــورة
    احداثا والتاريخ في قــــــــلوبنا محـــــفورة
    ومعظم رجالاتها تلقاهم أســـــــطورة
    &&&

    في الفول بتلقا تبوري والزين خبير فيهو
    واسماكا عند وهبة او بشري جار ليهو
    والقهوة عند حامد والناس حواليهو
    تحلف تقول الكل غير شــــــك مواليــــهو
    &&&
    وفي الخير بتلقا تجاني والاحمدين ناسو
    ومنيب حبيب الكل العالي احساسو
    وظرافة الكشيب في رنة اجراسو
    تسمع ادب وفنون وتشرب نخب كاسو
    &&&
    في كوستي العوالي تلاتة قالولك اختاها
    عالي السجن واحد والتاني مشفاها
    تالت التلاتة مقابر ود أم جبو سماها
    هادي العوالي عديل اوعاكا تغشاها
    &&&
    طفناها كوستي خيال من ذاكرة الايام
    حارمانا غربة بعيدة من زهرها البسام
    لكن قلوبنا محبة وبنشوفا في الاحلام
    وشاغلانا بي ريدا يا كوستي ليكي سلام
    &&&
    كانت ملامح خاطفة من كوستي والاحباب
    عذرا اذا ما القول كان فيهو حاجة تُعاب
    لكن عزانا وحيد للقول فتحنا ابواب
    ماالقصة قصة ريد من غير شرح واسباب

    محمد عبد القادر حسن
    الرياض - 27 أغسطس 2009م
    ومازال العشق متواصل . . . . فبرغم ان كوري هي اصلي وفصلي فقد تربيت ونشأت في حضان كوستي
    وللام التي ربت مثل حق الام التي انجبت .. فللاصل كوري السلام .. ولتراب كوستي التحية .

    Osama
    عضؤ مميز
    عضؤ مميز

    رد: مسدار كوستي

    مُساهمة  Osama في السبت مارس 13, 2010 11:05 am

    برغم معرفتي ( الضعيفة ) بهذه المدنية الحالمة على النيل الابيض إلاّ انني اجزم باني قد سكنتها يوما بهذه التعابير الصادقة والوصف الدقيق
    شكرا اخي محمد ( مرتين )
    واتمنى ان ينهج الجميع بالمشاركة بما يسمى بـ ( عشق المدن ) وهذا لا ينقص شيئا من حبنا وإرتباطنابقريتنا الحبيبة ..

    دمت بود ..

    Mohammed
    عضؤ نشط
    عضؤ نشط

    رد: مسدار كوستي

    مُساهمة  Mohammed في السبت مارس 13, 2010 11:27 am

    Osama كتب:برغم معرفتي ( الضعيفة ) بهذه المدنية الحالمة على النيل الابيض إلاّ انني اجزم باني قد سكنتها يوما بهذه التعابير الصادقة والوصف الدقيق
    شكرا اخي محمد ( مرتين )
    واتمنى ان ينهج الجميع بالمشاركة بما يسمى بـ ( عشق المدن ) وهذا لا ينقص شيئا من حبنا وإرتباطنابقريتنا الحبيبة ..

    دمت بود ..

    الاخ اسامة لك التحايا العطرة بقدر هذا الجمال المبثوث في ثنايا ردك .. ولربما كان قدرنا ان نعيش ونتربي ونعاشر اناس من خارج نطاق قريتنا الام ولكنني ابدا ما شعرت بالحسرة لهذا فلكل شبر من هذا الوطن معزته وصفاته الجميلة التي تزرع فيك عشقا لجماله المتمثل في طبيعة ارضه وهوائه واناسه الطيبين وثقافته التي هي جزء لا يتجزأ من التنوع ىالكبير الذي حبانا به الله من خلال تنوع البيئات في السودان .. وقد حضرتني في هذه اللحظات مناقشة طريفة دارت في وجود والدكم الكريم جدنا ( حسين طه ) على رمال كوري الحبيبة اما منزلكم العامر في موسم 2002 م وبطبيعة الحال كان الجد متحفز ومتحيز بصفة قوية لتراب القرية التي شهدت طفولته وشبابه واحلامه وآماله فكان سؤالي الذي اثار حفيظته بعد الشئ ان لماذا هذا العشق الجارف لتراب هذه القرية دون سواها فكان رده انها ارض الاباء والاجداد ومكان المولد والمنشأ فكان الرد البديهي هو انني كأحد الذين ولدوا وتربوا ونشأوا ووجدوا ابائهم في مكان اخر غير كوري ان اجد قلبي وانتمائي يميل بعض الشئ لمدينتي التي ولدت وترعرعت فيها .. ولكن بكل تأكيد لم استطع مجاراة الجد لما فيه من غيرة شديدة وحب منقطع النظير لكوري ورمالها فسكت احتراما له وخوفا من ان اثير حنقه علي وعلى كل الشباب الذين كان يتهمهم بقلة الانتماء لكوري .وان كان محبتنا لسواها من المدن لا يقلل من عشقنا لها كجذور ننتمي اليها حين نفصل للخلوق اصلنا .

      الوقت/التاريخ الآن هو الأحد فبراير 19, 2017 6:36 pm