قصة الخواجة اوباما ود عمي

قوم يا ولدي وخلي النوم الكتير دا وفي ضيوف في الصالون قوم شوفهم مالم
يا ابوي الواحد في البيت دا اصلا ما يقدر ياخد راحتو ولا شنو وبعدين ديل ضيوف شنو البجو الصباح دا
يا ودا الساعه اتناشر تقول الصباح وبعدين ديل ضيون غريبين ديل خواجات
شنو خواجات
ايوة خواجات ومالك منطط عيونك كدا قوم شوفهم مالم
بس يا حاج قول لي مبروك ديل ناس الامم المتحده معانها قبلوني اشتغل معاهم يا ابوي عليك الله شفت ولدك خطير كيفين فرجت يا حاج فرجت خلاص
يا ود انت ماك نصيح لو ديل ناس الامم المتحده بجو لحدي عندك ليه انت قايل نفسك شنو ما تسيب الوهم الانت فيهو دا وتقوم تشوف الجماعه ديل مالهم
في الصالون
تلاته خواجات لابسين بدل وقاعدين في كراسي الجلوس في الصالون
وبعد التحيه
هااااااااااااااااااي
هاااااااااااااااااااااااي
الخواجه
في الحقيقه انحنا مبعوتين من السفاره الامريكيه وعندنا شويه اجراءات عايزين نتاكد منها
يا ابوي ديل طلعو اولاد بوش
كيف يعني اولاد بوش
يا ابوي ديل جاين من السفاره الامريكيه قالو عندهم اجراءات في بيتنا دا انت يا ابوي بقيت تاجر نووي من ورانا ولا شنو
تاجر شنو انت يا ولد ما نصيح
اها يا ابوي يكونو جاين لشنو يعني يكون امي بقت من ناس تنظيم القاعده وانحنا ما عارفين ولا شنو
يا ولدي امك دي عليك الله عارفه شنو ولو سالتها تنظيم القاعده دا شنو بتكون ما عارفاه
اها يا ابوي يكون جاين لمنو يعني انا ولي تلاته سنه عاطل وما عندي شغله باي حاجه بتحصل في العالم دا يكون جابهم لي الملازم البنلعب ضمنه تحت الشجره بتاعتو ولا شنو
يا ولدي خليك من الكلام دا شوف البلوه الوقعنا فيها دي
اها يا جماعه قلتو لي اجراءات شنو الانتو جاين عشانها الحمد لله انحنا لا بتاعين نووي ولا تنظيم قاعده ولا حتي عندنا بترول في البيت دا
الخواجه يتكلم .............................
...............................................
...............................................
الله الله الله
يا ود مالك الله الله الله في شنو
يا ابوي ديل طلعو بعرفو عمي عثمان
عمك منو
عمي عثمان
وعمك عثمان الله يرحمو مالو كمان مع الامركان
والله يا ابوي ما عارفو مالو بس دقيقه النشوفوعمل ليهم شنو
احتمال لقو في قبرو بئر بترول
يا ود عمك اصلا ما مات في السودان
الخواجه يواصل الكلام....................
...............................................
.............................................
انت يا ابوي عمي دا مات وين
مات في كينيا
واها لما مات جابو ليكم الجثمان بتاعو
لا ما جابوهم لينا دفنوه قبلو
الخواجه يواصل الكلام ...........................
...................................
>..................................
يا ابوي انت عمي دا معرس
لا ما كان معرس ولا حاجتين مات صغير
لا ديل بقولو انو عمي دا كان معرس ليه واحده كينيه

كيف الكلام دا عمك دا عمك كان شغال تجاره بين السودان وكينيا وكان بمشي وبرجع طوالي وعمرو ما جاب لينا سيره انو معرس دي غايتو الله يرحمو ساكت
الخواجه مواصلا الكلام.............................
................................
..............................
يا ابوي ديل بقولو انو عمي دا عندو ولد كمان وهم جاين اسي عشان حكايه الولد دا
والله يا ولدي علمي علمك انا ما عارف اخو معرس من وين اعرف انو عندو ولد
وتعال هنا الناس مالهم ومال اخو كان معرس ولا مطلق الزول في قبرو عايزن منو شنو شوف لي الناس دي مالها من الاخر كدا انا خلاص راسي جاط ومافاضي لكلام الامريكان ديل
الخواجه مواصلا الكلام..........................
.........................
...........................
اها قالو شنو الناس الكفار ديل
يا ابوي ديل بقولو انو عمي دا اتزوج الكينيه دا وبعد ما مات سافرت امريكا وكانت حامل منو
اها الناس ديل جاين عشان يقولو لينا الكلام دا اما خواجات فاضين شغله
الخواجه مواصلا الكلام ..........................
...................................
..................................
الله الله الله
مالك يا ولد في شنو تاني
يا ابوي ديل بقولو ليهم في كلام كبير
هي فضل فيها كبير يعني قالو شنو
قالو ود عمي دا اسمو اوباما
اسمو منو
يا ابوي اسمو اوباما
اها يعني شنو اوباما
انت يا ابوي بتفتح قناه الجزيره دي ساكت
اوباما دا الرئيس الجديد لامريكا انت يا ابوي عايش وين
بعد ان اثبت الخواجه ان السيد اوباما هو ابنهم الذي لا يعرفو عنه شي وبعد ان استلم هذا الولد السلطه في امريكا كان لابد ان يبحث عن اسرته المفقوده والتي لم يلتقي بها سوي في تلك الاحديث التي كانت تروريها له الست امه
في ذاك اليوم لم تنام الاسره فقد انقلب حالها
وفي الصباح الباكر انتشر الخبر في كل ارجاء الحي لا الحي وحده انما في المدينه كلها
في سوق الخضار
حليمه بائعه الفول المدمس تتحدث الي نفيسه بائعه الطماطم
انتي يا نفيسه الليله وين جارتك عوضيه ماشيفاها جاءت السوق
اجي يا بنات امي انت ياحليمه ماسمعتي بالخبر ولا شنو
خبر شنو يا نفيسه يطرشني كان سمعت
قولو ليك ناس عوضيه ظهر ليهم ود ليهو كم سنه ما عارفين حتتو وين وقالو كمان ود مسؤول في بلاد بره وجابوه في التلفزيون واسي الناس من امس بتبارك ليهم وبيتم مدفوس ناس حته تختي فيها رجلك مافي
كان كدا يانفيسه عايني لحاجاتي دي امشي ابارك ليها وارجع
وكان المنزل ملئ بالوافدين من كل ارجاء المدينه وكانت الاسره تقسم الوافدين الي مجموعات
هنا الابن العاطل وشلته
وهناك البيت وزميلتها في الجامعه
والحاج ورجال الحله في الناحيه الاخرى
والحاجه وجاراتها في ناحيه اخرى
وكل واحد منهم يروي القصه علي طريقته الخاصه وكيف اتصل بهم السيد اوباما في ذاك اليوم وارسل لهم بعض من رجاله لترتيب سفرهم الي امريكا في اقرب وقت
نواصل في الجزء الثاني